買衫的誘惑
自中四開始,我就開始自己買衫扮靚。由中學時期的旺角中心、花園街,大學年代行聯合、香宮,仲有葵廣。投身社會後,各大小商場,又一城、沙田新城市到銅鑼灣希慎都留下不少足跡,有平有貴有大眾化,總之轉季、感謝日就係買衫嘅理由。當然,「件衫買來返工著㗎!」呢個抗辯理由,大家應該好理直氣壯咁講過啦! 當年少不更事嘅我,曾經敗家到每一次出街都要買一樣東西回家,那怕只是一個髮夾。現在回想,覺得自己真係有夠浪費金錢呀! 既然我那麼喜歡買衫,今天是如何做到每個月不可用多五百元買衫(包括衫、鞋、內衣褲等)呢? 1.不隨便網購 網上時裝店多如天上繁星,由Instagram、Facebook的小店,到大陸淘寶、韓國G MARKET,到底去邊度買衫好? 曾幾何時,以上的買衫渠道我都試過,但今天我唔會再去這些網買衫,原因係中伏得太多!Instagram、Facebook上賣衫的小店,好多時覺得啲衫靚,並唔係本身件衫靚,而係有其他原因: 第一、著衫個女仔有170高同唔過一百磅 (誇張咗,但唔係一般身型) 第二、拍攝的角度同塊鏡都係有少少斜斜地,感覺個人好修長 基於以上原因,好容易令人買入唔合身,又或者到期望有出入嘅衣服,所以我建議大家盡量都避免在這些地方買衫。當然而家IG同FB成日都彈啲廣告出來,你會唔覺意睇咗,但記緊咁樣買衫中伏機會率好高呀! 好長,下篇待續。。。